"ദി ബിഗിനിങ്"
2005 ഇലെ ഏതോ മാസം , ഏതോ ഒരു വെള്ളിയാഴ്ച,
നിരന്തരമായ പഠിത്തത്തിൽ നിന്നു ഒരു മോചനം കിട്ടിയത്, കോളേജ് ഇലെ സ്പോർട്ടസ് ഡേ യ്ക്ക് ആണ്. ഡെയ്‌ലി 9 മണിക്ക് ക്ലാസ് തുടങ്ങും, വൈകീട്ട് നാലു വരെ നിർത്താതെ ക്ലാസ്. ഫർസ്റ്റ് പിരീഡ് അറ്റൻഡ് ചെയ്യണമെങ്കിൽ 8 മണിക്ക് എങ്കിലും റൂമിൽ നിന്നു പുറപ്പെടണം.
പിന്നെ നമ്മൾ ഹോസ്റ്റലിൽ അല്ല, അതിന്റെ പരിമിതികളും ഉണ്ട്. 8 പേര് ഒന്നിച്ചു ഒരു കുഞ്ഞു വീടെടുത് കോളേജ് ന്റെ അടുത്തു ബക്കളം എന്ന സ്ഥലത്താണ് താമസം. ഹോസ്റ്റലിലെ ബഹളങ്ങൾക്ക് ഇടയിൽ സ്വസ്ഥമായി പഠിക്കാൻ പറ്റില്ല, എന്നു മനസിലാക്കിയ അക്കി ആണ് വേറെ വീട് എന്ന ആശയം ആദ്യം കൊണ്ടു വന്നത്.
അങ്ങനെ എട്ടു പേര് ഒരു വീട്ടിൽ നിന്ന് കുളിച്ചിറങ്ങി പോകാൻ തന്നെ ഒരു ടൈം ആവും.
എട്ടു പേരു എന്നു പറഞ്ഞാൽ, ഞാനും രഞ്ജീഉം ബാലനും മെയ്തീനും (നവീൻ ) ചെമ്പനും അക്കിയും അബീക്കയും എന്നേക്കയും.
ആറു മണിക്ക് എങ്കിലും എണീക്കണം മര്യാദക്ക് ക്ലാസിൽ എത്തനേൽ. ബാലനും മെയ്തീനും ഇലക്ടിക്കൽ ആണ്, ബാക്കി ആറും മെക്കാനിക്കൽ. ഇലക്ടിക്കലിൽ ക്ലാസിൽ കയറിയില്ലേലും ബല്യ കോയപൂലാ, പക്ഷെ നമ്മക്ക് അങ്ങനെ അല്ലല്ലോ.മേക്കാനിക്കലിൽ മാഷന്മാർ ഒക്കെ കട്ട സ്ട്രിക്റ്റ് ആണ്.
ക്ലാസൊക്കെ കഴിഞ്ഞു, അസിൻമെന്റ് , സർപ്രൈസ് ക്വിസ്, ലാബ് റിപ്പോർട്ട് റെക്കോർഡ് വർക്ക് ഇങ്ങനെ ഒക്കെ ഉള്ള ഒരുപാട് ചോറ പരിപാടീസ് ഉണ്ട് ഈ എഞ്ചിനീയറിംഗ് ഇൽ. അതൊക്കെ കയ്യുമ്പോഴേക്കും മനുഷ്യന്റെ നടുവൊടിയും..
അങ്ങനെ ഫുൾ ബിസി ആയിരിക്കുമ്പോ ആണ് ആറ്റു നോറ്റ് ഒരു സ്പോർട്ടസ് ഡേ വന്നത്.
രാവിലെ തന്നെ കോളേജ് ഇൽ വരുന്ന ശീലം ഉള്ളത് കൊണ്ട്, സ്പോർട്ടസ് ഡേ ആയിട്ടും നേരത്തെ വന്നു. സാധാരണ ഉഴപ്പന്മാർ ഇരിക്കുന്ന കാന്റീന്റെ സൈഡിൽ ഉള്ള കൾവർട്ട് ഒക്കെ അന്ന് ഫ്രീ ആയിരുന്നു. അവന്മാർക്ക് അവിടെ ഇരുന്നു ആ വഴി പോകുന്ന പെമ്പിള്ളേരെ വായി നോക്കലും കമാന്റടിക്കലും ആണ് പണി. ലേഡീസ് ഹോസ്റ്റലിലേക്ക് ഉള്ള മെയിൻ വഴി അതാണേലും , ഇവന്മാരെ പേടിച്ചു പല പെമ്പിള്ളേരും കോര്പറേറ്റിവ് സ്റ്റോർ നു മുൻപിലൂടെ ഉള്ള വളഞ്ഞ വഴിയിലൂടെ ആണ് പോകാരെന്നു ബാലന്റെ പെണ് സുഹൃത്തുക്കൾ അവനോടു പറഞ്ഞിനി പോലും.
നമ്മളെ ടീമിൽ ആകെ ബാലന് മാത്രേ പെമ്പിള്ളേര് മായി കമ്പനി ഉള്ളൂ. മെയ്തീൻ പിന്നെ ഭയങ്കര അലമ്പ് ആയോണ്ടു ഇലക്ടിക്കൽ ആയിട്ടും ഒനോട് പെമ്പിള്ളേര് ആരും മിണ്ടറില്ല. നമ്മ പിന്നെ മെക്കാനിക്കൽ, ക്ലാസിൽ പെമ്പിള്ളേര് ഇല്ല. വർക് ലോഡ് ഉള്ളതോണ്ടു ക്ലാസ്സ് വിട്ടു മറ്റു പെമ്പിള്ളേരെ ഒക്കെ നോക്കാനുള്ള ടൈം ഉം കിട്ടാറില്ല.
അങ്ങനെ, ആരും ഇല്ലാത്ത ആ സ്പോർട്ടസ് ദിവസം നമ്മ കൾവർട്ടിൽ ഇരുന്ന്, വരാൻ പോന്ന സെമസ്റ്റർ പരീക്ഷയെ കുറിച്ചു ചർച്ച ചെയ്യുകയായിട്ടുന്നു. ദേണ്ടെയ്‌, മെയ്തീന് ഓടിക്കൊണ്ടു വരുന്നു. അവന്റെ ക്ലാസ് ടൂറു പോന്നു പോലും. ഇപ്പോഴത്തെ പിള്ളേരുടെ "ഐ വി "
ഐ വി ഒക്കെ നഷ്ടമാണ്, പഠിക്കാൻ ഒന്നും കിട്ടില്ല, ആ പേരും പറഞ്ഞു, ചുമ്മാ കറങ്ങി സമയം കളയാൻ ആണ് എന്ന് അറിയുന്നോൻഡ് നമ്മ മെക്കാനിക്കൽ കാർ പൊതുവെ ഐ വിക്ക് പോകാറില്ല. ഇലക്ട്രിക്കൽകാറു ഒക്കെ ശരിക്കും അമ്പിള്ളേരും പെമ്പിള്ളേരും കൂടി അടിച്ചു പൊളിക്കാൻ പോണത് ആണ്.
മെയ്തീന് എന്തായാലും ആ അവസരം കളഞ്ഞില്ല. അവന് ടൂറിൽ എങ്കിലും ആരെയെങ്കിലും വളക്കണം എന്ന ചിന്ത ആയിരുന്നു. അങ്ങനെ അവരുടെ കൂടെ പോകാൻ തീരുമാനിച്ചു.
പെമ്പിള്ളേരെ ഒക്കെ പഞ്ചാരിടിച്ചു മടുത്ത ബാലൻ നമ്മളോട് ചോദിച്ചു, നമ്മക്ക് മാത്രം വേറെ ട്രിപ്പ് പോയാലോ.
ഐഡിയ കൊള്ളാം, എല്ലാരും ഏറ്റു പിടിച്ചു.
കൊച്ചിക്ക് പോകാം..
വൈന്നേരം ട്രെയിൻ ഉണ്ട്.
വീഗാലണ്ടിൽ പോകാം..
മറൈൻ ഡ്രൈവിൽ പോകാം..
ഫോർട്ട് കൊച്ചി പോകാം..
ഓരോ സജ്‌ഷൻസ് വന്നോണ്ടിരുന്നു.
ഇതു കുറെ കണ്ടിട്ടുണ്ടു എന്ന സീനിൽ ആയിരുന്നു എല്ലാരും.. പിന്നെ പ്ലാൻ ചെയ്യുന്നതിലെന്താ... വൻ പ്ലാൻ.
രഞ്ജി പക്ഷെ ഈലൊന്നും മൈൻഡ് ചെയ്തേ ഇല്ല. അല്ലേലും ഓനു പണ്ടേ ഈലൊന്നും ഒരു താല്പര്യോം ഇല്ല. എല്ലാ ക്ലാസിലും ഫ്രണ്ടു ബഞ്ചിലിരിക്കുന്ന പഠിപ്പി, പീസ് ഇല്ലേ, അതാണ് ഓൻ. അരസികൻ.
പറഞ്ഞു പറഞ്ഞു ആയപ്പോ എല്ലാരും പറഞ്ഞു ഞാനും ഉണ്ട് ന്നു. ഇടക്കിടക്ക് ബക്കളത്ത് കമ്പയ്ൻ സ്റ്റഡിക്ക് വരാറുള്ള സുനിയും മണ്ടനും കൂടി ട്രിപ്പില് വരാന്നു പറഞ്ഞു. എല്ലാരും വരുമെന്ന് പറഞ്ഞപ്പോ മനസില്ലാമനസോടെ രഞ്ജിയും റെഡി ആയി
7 ബക്കളം ടീമും 2 പയ്യന്നൂർ ടീം ഉം. 9 പേരായി.
രാത്രി 11 മണിക്ക് കണ്ണൂരിൽ നിന്നു കൊച്ചിക്ക് ട്രെയിൻ ഉണ്ട്, അയില് കേറി പോകാന്നു വെച്ചു.
ആ സമയത്തു ബക്കളത്ത് നിന്നു ബസ് ഉണ്ടാവോ..
ട്രിപ്പ് മുടക്കാൻ രഞ്ജി ഒന്നേറിഞ്ഞു നോക്കിയതാണ്.
നമ്മക്ക് നേരത്തെ കണ്ണൂർ പോവാം, ഇളയ ദളപതി വിജയ് ന്റെ പടം ഇൻഡ്, അതു കയ്യുമ്പോ 11 നടുത് ആവും..
അബീക്ക യുടെ കിടു ഐഡിയയ്ക്ക് മുന്നിൽ രഞ്ജി മുട്ടു മടക്കി.
കിട്ടാവുന്ന ബാഗ് ഒക്കെ എടുത്തു, അലക്കി വെച്ച ഷർട്ട് കൾ ഒന്നും ഉണ്ടാകാൻ ഉള്ള സാധ്യത ഇല്ലാത്തത് കൊണ്ട്, മണപ്പിച്ചു നോക്കി സ്മെല് കുറവുള്ള ഏതാണ്ട് എല്ലാ ഡ്രെസ്സുകളും എടുത് പാക്ക് ചെയ്ത്.
ദാരിദ്ര്യം പിടിച്ച കാലമായത് കൊണ്ടു അധിക ആൾക്കാരും ഉപയോഗിക്കുന്നത് ബാലന്റെ ഷർട്ടുകൾ ആണ്. ബാലൻ ആണ് ആ കാലത്ത് കോളേജിലെ ഫാഷൻ ഐക്കൻ.
ആ കാലഘട്ടത്തിലെ ഏതാണ്ട് എല്ലാ ടൈപ്പ് ഡ്രസ്സും ഓന്റെ കയ്യിലുണ്ടു. നമ്മളൊക്കെ സ്റ്റൈല് ആക്കാൻ ഓന്റെ ഡ്രസ് ആണ് എടുത്തിടാറു.
എന്തിനേറെ പറയുന്നു. നീല നിറത്തിൽ ഉള്ള, പൂച്ച കണ്ണുള്ള കോണ്ടാക്റ്റ് ലെന്സ് വരെ ഓനു ഉണ്ട്.
അങ്ങനെ എല്ലാം കെട്ടി പടത്തിനു കയറി...
നമ്മള് ചങ്ക്സ് ന്റെ ആദ്യ ട്രിപ്പ് അവിടെ തുടങ്ങുകയായി.
തുടരും.
